شخره اردنيه !

اخ خ خ خ خ خ خ خ خ... هادي اسمها شخره... انا بشخر لحالي و الكم كلكم , المعارضة التويترية الشعبية , بعرفش شو اسمكم , بس اللي بعرفه انكم كنت محط انظار الناس عند اندلاع الربيع الربيعي , و الجميع كان بنظر اليكم عأساس انكم راح تضغطوا من اجل التغير .

الكل كان بسمع عنكم قبل اكتر من سنة و نفسه يشوف كيف بتفكروا و وين رايحين بالبلد , عأساس انكم الفلتات الي بتستخدموا تويتر مش فيس بوك !! و الكل اجا يشوفكم و زاد عدد الاردنية بتويتر 253% يعني تقريبا ما ضل غير ابوي ما عنده تويتر .

هما اجو من هون و زادت القاعده الشعبية و بالتالي راح يزيد تأثيركم –اللي كان جميل- وووو, ولا اشي و انتو "فسّتوا"..

قبل اكتر من سنه كنّا نطالب بملكية دستورية , صلاحيات اقل للملك و اكثر للشعب , حكومة منتخبة و يستطيع الشعب مسألتها, تعديلات دستورية ,الغاء قوانين رجعية,محاكمة الفساد و البحث عن اصوله . . كنا بنطالب بحكم الشعب للشعب. كنا بنطالب بالحريه

و هلأ الشاطر , اللي بحزر كم مره رفض تكفيل الذهبي او بجيب فيديو النائب المسلح او بلقط خبر جواز احمر او بكتشف الخونه عالتويتر!.

بعد فشل الحكومة بتوجيه اصابع الاتهام بضياع البلد لمجموعة من المسؤولين القدامى و تحميلهم كافة المسؤولية , و كأن الحق عالسيارة مش السايق . اكتشفت الحكومة كبش فدى احسن من هدول كلهم , اكتشفت اشي اكبر من الكبش ,

اكتشفت  "جمل"... اكتشفت  "الشعب" ..

 اكتشفت نواب زعران و اصحاب مصالح حراميه و شيوخ عرصات و شباب متحمس و شباب مقطوع .

الكل عارف حركات بعض النواب لسحب الغضب الشعبي باتجاههم , بس كان واحد بمجلس النواب و بنضحك و بنعلق و ماشي  , بس هلأ ما النا سيره غير مجلس النواب , بدل نائب ازعر , صار عنا مجلس ازعر , و مش قادرين نلحق على قصصهم , كل يوم بخترعوا نهفه جديده,.

كل الناس طلعوا ماكلين البلد الا اللي كنا نطالب فيهم اول شي –سبحان الله- , المطاعم, مجلس النواب , الحلويات و,الدوواوين , الزعران و هيئة تنظيم قطاع الاتصالات و السكس و مخيم الزعتري . كل هادول بدهم يضروا الاردن ..

مش هادولاك , مش اللي عارفينهم من سنين !! و كأن البلد خربانة من شهرين بس!!!

انا عارف ان معظمكم فاهمين و عارفين نظرية التنفيس , بس احنا عم بنفّس الناس , حرام الشعب بعد كل هالسنين من الفساد و بيع اوطان و قوانين عرفية و عهرية . يفكّر ان مشكلته انه انتخب مجلس غلط و بنزبط غلطتنا  المره الجاي , حرام والله.

شو بدي بالاخر؟!... سلامتكم , طالبوا بكل الحريات الصغيرة و تابعوا كل الاخطاء الفردية اللي بدكم اياها بس ببساطة ما تنسوا الاصل , ما تنسوا تطالبوا بحرية وطن.