المسؤولين الاردنين على تويتر

المسؤولين الاردنين على تويتر

 امبارح عالتويتر , اجا وزير الشباب الاردني و   تويت اهم اربع اهداف لوزارته, ازا حاب تشوف الحوار الكامل   القصير شوف @lina18 

 1-  حماية الشباب سلوكياً و فكرياً

2-  تنمية العمل التطوعي التنموي

3-  تبني المبدعين و الموهوبين

4-  تعزيز محبة آل البيت و علماء الأمة على المستويين العلمي و الديني

الاهداف مش كتير مقنعة بوجهة نظري و وجهات نظر بعض الشباب, بس انا ما بدي اناقش الاهداف انا بدي احكي عن الحوار....  اللي صار, انه الدكتور كتبهم من هون و اجا كم شب حاول يناقشه بالاهداف , بعد 3 تويتات الدكتور حكالهم" الجدال لمجرد الجدال" ,,, انه انسى شو ان الجملة كليشيه قديم ,  و بينو بينكو قلبت مواجع بقلبي , انه لا.. بعرض البسس انت بدك تحكي زي مربي الصف ,زي  مدير المدرسة , زي عميد الكلية , زي كل وزير !!

انا كل اللي بدي احكيلك اياه يا دكتور انت وزير الشباب , يعني لخدمة و تطوير الشباب اللي انت منهم , فلازم صدرك يوسع عشان الشباب.     لأنه بيني و بينك , الشباب اللي ناقشوك لطاف و وردات , يعني لو انت وقعت مع  

 @kharooof   ‎@Andareee‏ @Mahmoudhomsi‏ ‎@Momanij‏

و غيرهم كتير  و الله هدول سفاحين انا بدخلش معهم بحوارات .

المسؤول التاني كان " المتحدث الرسمي باسم مديرية الامن العام" اللي كنت مش متأكد من هويته ,  المهم قعدين التويترجية الاردنية اخر هالليل و لا اكاونت المتحدث الرسمي بلش حكم و مقتطفات جميلة , انه انا بيني و بين حالي شكيت فيه, انه معقول المتحدث الرسمي , بس قلت كبر راسك , ما الك مصلحة , بلاش يطلع هو هو :] !! 
, المهم اجا واحد و قله : @PSDspokesman انو هاد الأكاونت للناطق الرسمي باسم الأمن العام, و لا أكاونت شخصي للحكم و العبر؟ شو الوضع؟

   انا قلت بلش النشويق, بلش الاكشن ... شو رح يرد عليه ., راح يعطيها دبلوماسية ولا يطنش ,,,, المهم بالاخر رد عليه "اللي بدك اياه"  و انا بيني و بين حالي قلت جواب معبر و اكيد هاد الناطق الرسمي باسم  الامن العام.

اللي بدي احكي لكل المسؤولين اللي في تويتر او بدهم يسجلوا في , ازا انتو فايتين عشان الناس تسمعكم و تحكي عنكم كووول و مودرن و تاخدوا ريتويتس يمين شمال ,,, انسى ,,, انسى يا عمرو

التويتر مش مجلس نواب و لا اعيان و لا حتى مجلس طلبة, التويتر مجلس شباب, مجلس شعب , و هم اللي بحطوا القوانين  هون مش انتو .

و بعدين "العتب على قدر المحبة",  "و هلا عمي" !

منفصم

الطب البيطري الاردني !!!

الطب البيطري الاردني !!!

قبل يومين  شفت على موقع سرايا خبر وفاة الطفلة صابرين و شكوك في خطأ طبي ,  و فجأة كل الاخطاء الطبية اللي شوفتها بعيني و سمعت عنها مرت امام عيني كتمت على صدري المخنوق اصلا

طول عمر اعلامنا الوطني و التعليم ,طابخ راسنا بتقدم الطب الاردني , و لو بنشد على حالنا شوي بنسبق المانيا و بريطانيا 

بس الواحد كبر شوي و شاف شويتين عرف ان كل هالحكي كذب و ضحك عاللحى.

"و مع ان الاردن من اكثر الدول المتقدمة في مجالات الطب" , الا ان مسؤولينا و حراميتنا بتعالجوا بره ؟!

عأساس الطب تبعنا بيطري مثلا!!

قبل فترة قعدت في مستشفى حكومي مع والدي عشان عملية المرارة, بالمستشفى التدخين مسموح و الكل بدخن, مواطنين مدنيين ,عسكريين, و مرضى و موظفين , المهم  , من متطلبات العملية انك تكون صايم عشن هيك بخلوك تبات قبل بليلة , المهم نمنا, صحينا الصبح (يوم العملية) ,  دخلت الممرضة و جايبة فطور!!! المهم اقنعنها بصغوبة  ان في عملية و ما لازم المري ياكل شي  .

دخلنا غرفة العمليات , و الاصل العملية بسيطة (زي ما حكى الدكتور: نص ساعة و بنطلع) , ابوي قعد 5 ساعات في غرفة العمليات , ساعتين يستنى يجيبوا دم عشان نسيوا , و 3 ساعات عملية جراحية عشان المرارة مش واضحة و الله اعلم انفجرت,  و لحقوا ابوي لحوق..

 انت بس تخيل اهل المريض بستنوا ,, اقولك اتخيل امي اللي حكولها : نص ساعة , ساعة الا , و جوزك بطلع , اتخيل 5 ساعات و شوف مخك لوين راح يوصلك  !! و مخك اللي ما حده فهموا شو في احتمالات او مضاعفات .

المهم طلعوا الدكاترة من غرفة العمليات (ابوي لسه جوة) و واحد واسطة فوتنا على فسم العمليات عشان الدكتور يطمننا , الدكاترة قاعدين في المكتب و ابوي بالغرفة اللي جنبهم , الدكتور و الممرض تعبانين بعد العملية , طلع كل واحد سيجارة و شد نفس ( بقولك  السيجارة بعد العملية ,احلى من اللي بعد الدُخلة) .

قعدنا 3 ليال في المستشفى. كل يوم في طوشة او طوشتين في الطوارىء , اهل بتهموا الدكاترة او الممرضين بالتقصير (منهم 2 مرضى ماتوا).

يعني معقول كل الناس هاي عملاء مؤامرة و اصحاب اجندات و بتبلوا عليكوا ؟!!!؟

يعني واحد فات يعمل غسيل كلى مات , عادي يعني؟! ما بتحس ان الوضع غلط؟! و اسمع قصص يمين شمال من ها الناس , واكيد الكل سمع , و ما الو داعي نلت و نعجن .

بعرف ان في دكاترة اردنيين عالميين, و شاطرين و بياخذوا بالثانية زي ميسي, وبنعمل عمليات من الاخر و عنا اجهزة اقوى نوع , بس المشكلة برأي : النظام و القانون.

يعني مش مبدأ ابوك يفوت العملية و انت مش عارف شو بدهم يسووا , مش عارف , المضاعفات و الاحتمالات , و تقعد تحزر , و تسمع فتاوي من كل محترم بالمستشفى عن حالة ابوك , .الا الدكتور.. عملك اياها مفاجأة.

بس يموتلك حد بالمستشفى , و تحس انه في شي غلط شو بتعمل ؟!!!

ولا اشي!! , الناس بتعمل فيك , اول كلمة بتسمعها من قرايبك قبل الفريق الطبي : قضاء و قدر !!! يا حبيبي هو انا جاي على خطبة الجمعة؟ بعرف القضاء و القدر و مؤمن , بس انت يا مؤمن شو عملت جوا في مريضي ؟! عملت كل واجباتك ؟ و لا نسيت تجيب دم , ما بتعرف ان عنده سكري , الفحوصات قديمة , المرارة طلعت بعيدة... ؟؟!

 عادي يعني, ما هو  لو واحد طخ ابوي اسمه قضاء و قدر !!!

المهم شو خياراتك ؟!

ازا مخك خرى , بتروح عالسيارة و بتجيب الجك , و بتفتح راس الدكتور اللي انت الوحيد اللي عارف انه اخو ستة و ستين ,, و قتل ابوك او شطبوا و عمرك ما رتح تثبت هالحكي.

ليش ما راح تثبتوا , عشان في واحد راح يضل يزن في راسك و راس اللي حوليك  (قضاء و قدر, قضاء و قدر, قضاء و قدر) , او ياخذوا عطوة , او تكون محترم و تروح عالمحاكم !! محاكم..حبيبو لقلبي ,,. يعني دعوة و محكمة , و المستشفى تعطيك تقارير ازا عندها اصلا, , و المواطن لا عنده ثقة بالمستشفى اللي قتلت مريضه , و لا بالقانون اللي ما بعرف طريقه.

المقصر لازم يُسأل و يتحاسب , و يتعاقب.

المُسألة و المحاسبة و العقاب , مش اختراع جديد , او بدعة,, عادي,,, من ايام آدم لهلأ , و في جريمة و عقاب.

المُسألة القانونية ليست وسيلة تشكيك , المُسألة  وسيلة ازلية لتفادي الاخطاء و حفظ الحقوق .

منفصم

و هلأ لوين , رأي بأسلوب مش كتير نايس +18

امبارح روحت حضرت فيلم نادين لبكي الجديد " و هلأ لوين" , و بصراحة انبسطت كتير , مشاعر متناقضة جميلة, و كوميديا ممتعة, و 
موسيقى مفعمة بالاحاسيس و اخراج اكتر من مميز.

سيبونا من الحكي الفاضي و الفلسفة و خدوا الصافي ,

وصلت سينما برايم و اشتريت تذكرة الفيلم ب 8 دنانير , انبعص كيفي , و بلشت احسب السعر بالجنيه و الدولار , و كيف ما حسبتها كان ينسم بدني زيادة , فأول شي : اخت 8 دنانير يا عمي و الله كتير.

مع انه نص اسبوع بس العدد كان اكتر من ممتاز , في 8 صفوف فل , طبعا معظم الحضور نساء , و معظم المعظم هاد فوق 40 سنة , و هادا شي دايما بتشوفوا في الافلام الجيدة , برأي: ان النسوان بالاردن بحبوا و بفهموا الافلام اكتر من الرجال .

طبعا اول ما تحضر الفبلم بدك تقارنه ب "سكر البنات" , انا حبيت "سكر بنات" اكتر , النص و الاخراج كانوا كتير احسن , الموسيقى احسن -جوزها اللي كتبها عفكرة- , و الحبكة احبك من هيك ما فيش.

هلا نحكي شوي عن الموزة : نادين لبكي , طبعا انا بنشلق عرضي عليها و بحب اعمالها كتير , من ايام الفيديو كليب لهلأ , البنت مبدعة اكيد , مع انها ما عملت غير هالفلمين , بس عاملة شغل جامد كيك, و هي مخرجة احسن من ممثلة , و صاروخ احسن من الاتنين.

وين المشكلة عند نادين –غير انها نصحانة شوي- لازم تطلع من موديل افلام النساء المقهورين اليوم قبل بكرة , لانوا فيلمين عن النساء اشي جميل , بس 3 راح تعلق.

ما حكينا شي عن الفيلم صحيح : الفيلم بحكي عن معاناة ضيعة معزولة نسبيا بلبنان من الطائفية الدينية ( مسلم و مسيحي) و باطار دارمي, كوميدي , غنائي, هادا شي ما حبيتوا كتير , يعني الفيلم لازم يكون في اطارعام واحد , بالعربي افلام عبد الحليم الغنائية ما بتدخل راسي,

هلا موضوع العنصرية بخوف كتير و محتاج نسوان مش رجال الصراحة , بس عشان تتخيل قديش صعب فكر معي انك بدك تعمل فيلم عن العنصرية في الاردن بين اردني و فلسطيني(ازا رأيك فش عنصرية اطلاقا خش في طيزي) , طبعا الهدف من الفيلم انه نعالج الظاهرة يعني الهدف شريف يا شريف انت و اياه.. ببساطة بفيلمك هاد انت ممكن تخرب اكتر ما تصلح , عشان هيك لازم تركز و تفهم كل الابعاد, و هادا مش اختراع , يعني اميركا نقرت راسنا بافلام التميز العنصري و بطريقة ممتازة و بتساعد , و فبلم نادين كان اكتر من رائع ب هالناحية .

ملاحظة اخيرة : ازا اللغة تبعتي ما عجبتك و عيب , ما الك مصلحة تحضر الفيلم بالمرة .

نابوليتانا

من سنيين3 قررت اقرأ بلوغز, و كان في كمية جيدة من بلوغرز جيدين , معظمهم زهق الكتابة و صار التويتر هو" البلوغ" تاعهم

المهم هلال شومان كاتبي المفضل و هو موهوب اكيد

نابولتانا : رواية مفصومة عن واحد مفصوم لواحد مفصوم.. بس زي ما هو واضح انا بحب المفاصيم كلهم,,, الرواية اعطيتها نجمتين من خمسة , الشي الاكيد اني ما حسيت بالتشويق , ما بعرف كيف,, بس لازم يكون في شي يخليك تاكل الصفحات عشان تعرفة ,, هلال كتب خواطر احلى بكتير (اكيد كتابة رواية غير ) و بتمنى يكتب روايات اجمل ,,

الرواية : "لم تكن (واو) , هذا لا يعني انها لم تكن جيدة, هي فقط رقيقة في لحظتها,والواحد منا يحبها اذ يظن انه وجد فيها شيئا من نفسه "*

*نابوليتانا

monfasem

Starter,,,

It's 12:33 am now , and just finished reading a novel called (نابوليتانا) Napolitana , and decided to get these huge scenarios of my head , not through them away but put them some where else .

so here i am ..

monfasem